من طرف ربنا يجعلها سنة خير ويمن وبركة
قولوا امين
انا عملت الرز المبهر اللى هو الريزو
بجد تحفة ومش ببطل اعمله خالص
يلا بقا نعمل الرز
نجيب معلقة زبدة ومعلقتين سكر
نحطهم ع النار لغاية ما السكر يكرمل
بس اوعو يتحرق وتكونو مجهزين البصل متقطع وجاهز وفى ايديكو عشان السكر بيتحرق بسرعه
اول ما السكر يبقى دهبى ننزل بالبصل ع طوووووول
نشوح البصل وننزل عليه بالشوربة كوبايتين شوربة فراخ فيها قطع صدور فراح
ونحط بقا توابلنا اللى هى
ملح
فلفل
نص معلقة كارى
معلقة بهارات حارة
وبعدين ننزل بالرز ونخلى النار زى الشمعة هاديه خاااااااالص
ونقفل ونسيبه ونروح نجهز الصوص اللى بيكون فوق الريزو ودا سهل خالص
وطعمه احلى من كنتاكى كمان
هنجيب صويا صوص حلوة ( حلوة مش صويا صوص عادية )
كاتشب
هوت صوص
هنحط نص الكميه صويا حلوة وربعها كاتشب والربع هوت صوص
يعنى 4 معالق صويا حلوة و معلقتين كاتشب ومعلقتين هوت صوص
هنجيب الامورة دى بتاعت الكاتشب اصلى معرفش اسمها هههههههههه
هنحط فيها الكمية اللى حضرناها ونرجها كويس
كدا بقى الرز استوى وبقى مفلفل وجميل
نغرفه بقى
ونحط عليه الصوص من فوق وادى الشكل النهائى
