من طرف النهارده بقي عملت تشيز رولز انما ايه جميل اوووووي و هايل جدا للفطار او العشاء و سهل كمان
وبصراحه استوحيت فكرته من الفتوكه zatoona magnoona بجد بشكرها خالص
ودي صوره تجويعيه
يلا نبدا باسم الله
اولا انا عملته بعجينه العشر دقايق و اكيد كلنا عارفنها و اللي مايعرفهاش هاقولها بردو
هي عباره عن مجموعتين
المجموعه الاولي تتكون من :
2 معلقه كبيره خميره فوريه
2 م ك لبن بودر
2 كوب دقيق
2 كوب ماء دافي
م ص ملح
ربع كوب سكر
و نخلطهم كويس ونسبهم عشر دقايق
دي صوره المجموعه الاولي من العجينه بعد 10 دقايق
المجموعه التانيه:
3 كوب دقيق
نصف كوب زيت
م ص بكنج بودر وده اختياري
وهاتضفيهم للمجموعه الاولي
وممكن تعمل ينص المقدار و بيطلع هايل انا بعمل نص علي طول
هاتسبيها من نص ساعه لساعه تخمر و بعد مانشكل هانيبها نص ساعه كمان
ممكن تشتغلي بيها علي طول لو تحبي و تسبيها تخمر بعد ماتتشكل ساعه
ودي بعد ماضفت المجموعه التانيه و خمرتبعد اقل من ساعه
كده خلصت العجينه
المطلوب للحشو بقي :
جبنه بيضا فيتا
جبنه رومي مبشوره
جبنه موتزاريلا
فلفل مقطع مكعبات
زيتوب اسود مقطع
حبه البركه
الطريقه بقي
هاناخد العجينه و نرش دقيق و نفردها علي شكل مستطيل بقدر المستطاع
بعد كده هانجيب جبنه فيتا و نفردها علي العجينه بالشكل ده
بعد كده هانحط شويه زيتون مقطه و فلفل مقطع
و هانحط رشه جبنه رومي مبشوره
وبعدين موتزاريلا
وهانلفها رول كده ونبل طرفها بميه عشان تقفل كويس
و نقطعها بالشكل ده
ونرش فوقيها حبه البركه ونحطها في صينيه مدهونه سمن و مرشوشه دقيق او علي ورق زبده
هانسبها تخمر شويه حوالي نص ساعه
وده شكلها
و هانحطها في الفرن علي 180 هاتاخد حوالي ربع ساعه او تلت ساعه و بصي عليها كل شويه
وده شكلها بعد ما استوت
ولو هاتسبيها تتحمر اكتر بالشوايه هاتبقي كده
وده شكلا من قريب
وده بعد ماقطعتها عشان اوريكم هشه ازاي و جميله
